Fondo Arde Lucus Concello de Lugo
Lara Méndez

Alcaldesa de Lugo
Carmen Basadre

Concelleira de Cultura, Turismo, Xuventude e Promoción da Lingua

De novo Lugo, os días 13,14,15 e 16 de xuño, transfórmase en Lvcvs Avgvsti ofrecendo un completo programa de actividades este ano tan especial no que se cumpre o dezaoito aniversario do Arde Lvcvs.

Gozaremos de sorpresas máxicas que nos farán retroceder no tempo.

As luguesas e lugueses sentimos orgullo do noso pasado, de Lvcvs Avgvsti, por eso saímos ás rúas a revivir a historia. 

O Arde Lvcvs, a través do traballo das asociacións, consegue ser un factor clave de difusión e coñecemento da nosa festa e da nosa cidade, única polos seus Patrimonios, pola Muralla Romana e polos seus xacementos arqueolóxicos,  sen esquecer a gastronomía e a natureza.

Pero o máis importante son as persoas que fan de Lugo unha cidade acolledora na que todas as súas portas están abertas e na que as pedras do cinto que rodea a cidade transmiten olor, sabor e sons de tempos ancestrais.

Grazas á participación e implicación da cidadanía, axentes sociais, colexios, clubs deportivos, organismos privados e, por suposto, de novo as asociacións, o Arde Lvcvs convértese nun referente das festas de recreación histórica. 

Grazas tamén a todas as persoas, tropas e lexións que nos visitan. 

Deixádevos transportar, viaxar no tempo coas tribos castrexas e as lexións romanas de Lvcvs Avgvsti.

Veciñas, veciños, visitantes, romanas e romanos, castrexas e castrexos, gozade dun pasado máis vivo ca nunca. Vivide con nós a historia!

Que non se apague!

Viva o Arde Lvcvs!

Viva Lvcvs Avgvsti!!!