Fondo Arde Lucus Concello de Lugo
idiomas
Lara Méndez

Alcaldesa de Lugo
Mauricio
 Repetto Morbán

Concelleiro de Xuventude e Deportes

Nuns días, a cidade retrocederá 2.000 anos. De novo, o alegre bulicio do ir e vir de romanos e castrexos encherá as rúas do centro histórico da nosa amada Lucus Augusti e da súa contorna para que non esquezamos nunca as nosas orixes. 

Do 9 ao 12 de xuño abriranse, de novo, as portas dos campamentos e poboados para que poidamos rememorar o legado que nos deixaron os nosos devanceiros, a historia, o patrimonio e as tradicións que conforman a nosa identidade como pobo. Visitaremos as domus romanas e os templos das vestais, festexaremos as vodas celtas e da antiga Roma, vibraremos coas loitas de gladiadores e co circo romano, celebraremos o acendido do fogo sagrado, aplaudiremos os desfiles e acudiremos aos enterros dos nosos líderes. 

Bailaremos, cantaremos, iremos ao teatro e homenaxearemos á máxica Lugo de hai vinte séculos, que regresará con todo o seu esplendor tras dous anos onde a pandemia só nos permitiu manter a chama do lume do Arde Lvcvs a medio gas, pero ben viva, sinalándonos a nosa fortaleza e a nosa capacidade para reinventarnos e adaptarnos, porque unidos somos invencibles.

Para a nosa cidade, o Arde Lvcvs é moito máis que un festexo de recreación histórica xa que reflicte o noso carácter, aberto como bos anfitrións con todas as persoas que nos visitan, orgulloso do pasado que atesouramos e coidadores da nosa cultura como amosa, así, non só a implicación das 19 asociacións que traballan os 365 días do ano para que esta celebración sexa unha realidade coa maior precisión histórica posible, senón tamén o compromiso de toda a cidadanía lucense. Colectivos de todos os ámbitos, clubs deportivos, centros educativos, organismos, patrocinadores, veciñanza de todas as idades, persoal do Concello de Lugo... grazas a todos e todas pola vosa especial dedicación nesta festa, xa declarada de interese turístico galego e nacional e que pronto será tamén declarada de interese internacional.

Durante este dous anos non descansamos para consolidarnos como referentes en todo o mundo. Xornais, radios, revistas e televisións de Francia, Italia, China, Uruguai, Arxentina, Brasil, México, Bulgaria ou Canadá, entre outros países, recolleron amplas reportaxes sobre a nosa festa, e os vídeos que nos proxectaron virtualmente durante a pandemia chegaron ás redes de máis de medio millón de persoas, especialmente de Reino Unido, Portugal, Estados Unidos, Alemaña, Romanía e países de América Latina. Tamén sumamos un novo galardón como destino turístico, o Tourism Women Friendly, que recibimos en Fitur como recoñecemento ao papel que xogan as mulleres nesta festa.

Son moitos, pois, os motivos para sentirnos gozosos este 2022. 

E con esta alegría convidámosvos a participar nos especiais festexos deste ano. 

Mergullarvos connosco na historia que nos identifica como fogar bimilenario, que abrimos ao mundo con xenerosidade unha edición máis. Porque a chama do Arde Lvcvs nunca deixou de brillar para indicarnos o camiño a seguir.